“Səhliyalı” şirkətinin dəstəyi ilə ağacəkmə aksiyası keçirilib
Oktyabrın 26-da Abşeron Rayon İcra Hakimiyyətinin təşkilatçılığı, “Səhliyalı” şirkətinin maliyyə dəstəyi ilə Bakı-Şamaxı yolunun Müşfiq qəsəbəsi ərazisindən keçən hissəsində ağacəkmə aksiyası keçirilib.
Şirkətin İctimaiyyətlə əlaqələr şöbəsindən verilən məlumata görə, sentyabrın 19-20-də Qarabağda aparılan "antiterror əməliyyatları" zamanı həyatını itirən Şəhidlərimizin xatirəsinə ərazidə 200-dən çox ağac əkilib.
Tədbirdə İcra hakimiyyətinin və “Səhliyalı” şirkətinin rəhbər şəxsləri, hər iki qurumun əməkdaşları ilə yanaşı, şəhid ailələrindən də iştirak edənlər olub.
“Aksiya zamanı sonuncu döyüşlər zamanı şəhid olan 203 nəfərin hər birinin xatirəsinə 1 ağac olmaqla ümumilikdə 203 ədəd şam ağacı əkilib, şirkətin ayırdığı maliyyə vəsaiti ilə ağacların suvarılması üçün əraziyə su xətti çəkilib, həmçinin ərazidə təmizlik-abadlıq işləri aparılıb.
Tədbirdə bundan sonra da Abşeron rayonunun yaşıllaşdırılması, yaşıllıqlara qulluq və abadlıqla bağlı tədbirlərin davam etdirilməsinin vacibliyi qeyd edilib.
Qeyd edək ki, “Səhliyalı” şirkəti bundan əvvəl də dəfələrlə Şəhid və qazilərlə bağlı çoxsaylı tədbirlər həyata keçirib. Sonuncu belə aksiya zamanı şirkət əməkdaşları 100-dən çox şəhid və qazi ailəsi ilə görüşüblər və onlara ərzaq və puldan ibarət bayram sovqatı çatdırıblar.
